കോഴിക്കോട്: മെഡിക്കൽ കോളേജിൽ ചികിത്സ വൈകി രോഗി മരിച്ചെന്ന് പരാതി. കോഴിക്കോട് മെഡിക്കൽ കോളേജിനെതിരെയാണ് ആരോപണം ഉയരുന്നത്. കോഴിക്കോട് പേരാമ്പ്ര സ്വദേശി രജനിയാണ് ഇവിടെ വച്ച് മരിച്ചത്.
നാവിന് തരിപ്പും കാലിന് അസഹ്യമായ വേദനയും അനുഭവപ്പെട്ടതിനെ തുടർന്നാണ് രജനി കോഴിക്കോട് മെഡിക്കൽ കോളേജിൽ എത്തിയത്. നവംബർ 4 നാണ് ഇവർ ആശുപത്രിയിൽ ചികിത്സ തേടിയെത്തിയത്. എന്നാൽ ഇവരെ കൃത്യമായി പരിശോധിക്കാതെ മാനസിക രോഗത്തിനുള്ള ചികിത്സയാണ് നൽകിയതെന്നാണ് കുടുംബം ആരോപിക്കുന്നത്.
ഇന്ന് പുലർച്ചെ 2 മണിയോടെയാണ് രജനി മരിക്കുന്നത്. ന്യൂറോ സംബന്ധമായ ചികിത്സയ്ക്ക് എത്തിയ രജനിക്ക് ഏറെ വൈകിയാണ് ന്യൂറോ ചികിത്സ നൽകിയതെന്നും കുടുംബം ആരോപിക്കുന്നു. മാത്രമല്ല രോഗാവസ്ഥ തിരിച്ചറിയാതെ ചികിത്സിച്ചത് ആരോഗ്യസ്ഥിതി മോശമാക്കിയെന്നും ബന്ധുക്കൾ പറയുന്നു. സംഭവത്തിൽ അന്വേഷണം ആരംഭിച്ചതായി മെഡിക്കൽ കോളേജ് അധികൃതർ അറിയിച്ചിട്ടുണ്ട്.
