മംഗലപുരം: ഗവർണർ ആരിഫ് മുഹമ്മദ്‌ ഖാൻ പങ്കെടുക്കുന്ന പരിപാടിക്ക് കറുത്ത വസ്ത്രത്തിന് വിലക്ക് ഏർപ്പെടുത്തി സ്കൂൾ അധികൃതർ. തിരുവനന്തപുരം മംഗലപുരം കാരമൂട് ബിഷപ് പെരേര സ്‌കൂളിലാണ് സംഭവം. വി ഐ പി സന്ദർശനം ആയതിനാലാണ് ഇത്തരത്തിലുള്ള ഒരു നിർദ്ദേശം നൽകിയതെന്നാണ് സ്കൂൾ അധികൃതർ പറയുന്നത്.
പരിപാടിയോട് അനുബന്ധിച്ച് നിർദ്ദേശങ്ങൾ അടങ്ങിയ സർക്കുലർ കുറച്ചു ദിവസങ്ങൾക്ക് മുൻപ് പ്രിൻസിപ്പൽ പുറത്തിറക്കിയിരുന്നു. ഇതിലാണ് വിവാദമായ പരാമർശങ്ങൾ അടങ്ങിയിരിക്കുന്നത്. നാളെയാണ് ഗവർണർ പങ്കെടുക്കുന്ന പരിപാടി സ്കൂളിൽ നിശ്ചയിച്ചിരിക്കുന്നത്. സ്‌കൂളിൻ്റെ 46-ാമത് വാർഷികാഘോഷങ്ങളുടെ ഭാഗമായാണ് ഗവർണർ എത്തുന്നത്. വൈകുന്നേരം 3 മണിക്ക് നടക്കുന്ന പരിപാടി ഗവർണർ ഉദ്ഘാടനം ചെയ്യും.
പരിപാടിയുമായി ബന്ധപ്പെട്ട് നടപ്പിലാക്കേണ്ട തീരുമാനങ്ങളെ കുറിച്ച് പ്രിൻസിപ്പൽ ഇറക്കിയ സർക്കുലറിൽ പരാമർശിക്കുന്നുണ്ട്. രക്ഷിതാക്കൾക്ക് പരിപാടിയിൽ പങ്കെടുക്കാനുള്ള അവസരം ഉണ്ടെന്നും എന്നാൽ പരിപാടിയിലേക്ക് വരുന്നവർ കറുപ്പ് വസ്ത്രം ധരിക്കരുതെന്നുമാണ് സർക്കുലറിൽ പറയുന്നത്.എന്നാൽ കറുത്ത വസ്ത്രം ധരിച്ച് എത്തുന്നവരെ തടയില്ലെന്നും സ്കൂൾ അധികൃതർ പറയുന്നത്.
