കൊച്ചി: നടി ഹണി റോസ് നല്കിയ സൈബര് അധിക്ഷേപ പരാതി പ്രത്യേക സംഘം അന്വേഷിക്കുമെന്ന് റിപ്പോർട്ട്. സെൻട്രൽ എസിപി ജയകുമാറിനെ നേതൃത്വത്തിലാണ് പ്രത്യേക സംഘം. സെൻട്രൽ സിഐയുടെ നേതൃത്വത്തിൽ അന്വേഷണവും സെൻട്രൽ എസിപിക്ക് കേസിൻ്റെ മേൽനോട്ട ചുമതലയും നൽകി. ആവശ്യമെങ്കില് അന്വേഷണ സംഘം വിപുലീകരിക്കുമെന്നും കൊച്ചി പൊലീസ് വ്യക്തമാക്കി. സൈബർ സെൽ അംഗങ്ങളും അന്വേഷണ സംഘത്തിൽ ഉൾപ്പെട്ടിട്ടുണ്ട്.
ഹണി റോസിന്റെ പരാതിയിൽ ഇന്നലെ ബോബി ചെമ്മണ്ണൂരിനെതിരെ പൊലീസ് കേസെടുത്തിരുന്നു. ഇതിനു പിന്നാലെ അശ്ലീല കമൻ്റിട്ടവർക്കെതിരേയും നടി പരാതി നൽകാനൊരുങ്ങുന്നുവെന്നാണ് അറിയുന്നത്.
ബോബി ചെമ്മണ്ണൂരിന് എതിരായ കേസിൽ നടി ഹണി റോസിൻറെ മൊഴി ഉടൻ രേഖപ്പെടുത്തും. നോട്ടീസ് നല്കി വിളിപ്പിക്കുന്നതും പൊലീസ് പരിശോധിച്ചു വരികയാണ്. സ്ത്രീത്വത്തെ അപമാനിച്ചതിന് ജാമ്യമില്ലാ വകുപ്പ് പ്രകാരം എറണാകുളം സെന്ട്രല് പൊലീസാണ് കേസെടുത്തത്.
