തിരുവനന്തപുരം: തിരുവനന്തപുരത്ത് മെഡിക്കൽ വിദ്യാർത്ഥിയായ മകൻ അച്ഛനെ വെട്ടിക്കൊന്നു. തിരുവനന്തപുരം വെള്ളറടയിലാണ് സംഭവം. കിളിയൂർ സ്വദേശി ജോസ് (70) ആണ് കൊല്ലപ്പെട്ടത്. മകൻ പ്രജിൻ ജോസ് വെള്ളറട പൊലീസിൽ കീഴടങ്ങി.
സംഭവം നടന്ന സമയം പ്രജിന്റെ അമ്മയും വീട്ടിൽ ഉണ്ടായിരുന്നു. ഭർത്താവിനെ വെട്ടിക്കൊല്ലുന്നത് കണ്ട അമ്മ സുഷമ കുമാരി ബോധരഹിതയായി വീഴുകയായിരുന്നു. തുടർന്ന് ഇവരെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. സ്വതന്ത്രമായി ജീവിക്കാൻ അനുവദിക്കാത്തതിനാലാണ് അച്ഛനെ കൊലപ്പെടുത്തിയതെന്നാണ് പ്രതി പൊലീസിനോട് പറഞ്ഞത്.
ചൈനയിൽ മെഡിസിൻ പഠിക്കുകയായിരുന്നു പ്രജിൻ. തുടർന്ന് കോവിഡ് ആയതോടെ പഠനം മുടങ്ങി നാട്ടിലേക്ക് മടങ്ങി വരികയായിരുന്നു. പ്രജിനെ വെള്ളറട പൊലീസ് ചോദ്യം ചെയ്യുകയാണ്.
