തിരുവനന്തപുരം: പാരിസിൽ വച്ച് നടക്കുന്ന ലോക പാര അത്ലറ്റിക്സ് ഗ്രാൻഡ് പ്രിക്സിൽ ഇന്ത്യക്കായി സ്വർണ്ണം നേടി കേരളത്തിൽ നിന്നുള്ള മുഹമ്മദ് ബാസിൽ. 100 m – t47 വിഭാഗത്തിൽ 11.06 സെക്കൻ്റ് കൊണ്ട് ഫിനിഷ് ചെയ്താണ് ബാസിൽ സ്വർണ്ണം നേടിയത്. പൊന്നാനിക്കാരനായ ബാസിൽ കഴിഞ്ഞ ഒരു വർഷമായി സ്പോർട്സ് അഥോറിറ്റി ഓഫ് ഇന്ത്യയുടെ തിരുവനന്തപുരത്തുള്ള LNCPE ക്യാപസ്സിൽ ഹൈ പെർഫോമൻസ് കോച്ച് ശ്രീനിവാസൻ്റെ കീഴിൽ പരിശീലനത്തിലാണ്.
ഡൽഹിയിൽ വച്ചുനടന്ന ഖേലോ ഇന്ത്യാ പാര ഗെയിംസ്സിലും ബാസിൽ സ്വർണ്ണം നേടിയിരുന്നു. ഈ അടുത്ത് ദക്ഷിണ കൊറിയയിൽ വച്ച് നടന്ന ഏഷ്യൻ അത്ലറ്റിക്സ് ചാമ്പ്യൻഷിപ്പിൽ നേടിയ 5 മെഡലുകൾക്കൊപ്പം ബാസിലിൻ്റെ മെഡൽ കൂടിയാകുമ്പോൾ അന്താരാഷ്ട്ര നിലവാരത്തിലുള്ള പരിശീലനങ്ങൾക്ക് ഒഴിച്ചുകൂടാൻ കഴിയാത്ത പരിശീലനകേന്ദ്രമായി സ്പോർട്സ് അഥോറിറ്റി ഓഫ് ഇന്ത്യയുടെ LNCPE തിരുവനന്തപുരം സെൻ്റർ മാറുകയാണ്.
