ഡൽഹി: റിപ്പോ നിരക്ക് വെട്ടിക്കുറച്ച് ആർബിഐ. റിപ്പോ നിരക്ക് 0.50ശതമാനമാണ് ആർ ബി ഐ കുറച്ചത്. ഇതോടെ റിപ്പോ നിരക്ക് 6 ശതമാനത്തില്‍ നിന്നും 5.5 ശതമാനമായി. സാമ്പത്തിക വർഷത്തെ രണ്ടാമത്തെ പണനയത്തിലാണ് റിസർവ് ബാങ്ക് വൻ ഇളവ് പ്രഖ്യാപിച്ചിരിക്കുന്നത്.
പണനയ യോഗത്തിലാണ് തീരുമാനം. തുടർച്ചയായ മൂന്നാം തവണയാണ് റിപ്പോ നിരക്കിൽ കുറവ് വരുന്നത്. ഈ വർഷം ഫെബ്രുവരി മുതൽ 100 ബേസിസ് പോയിന്റ് ആണ് റിപ്പോ നിരക്കിൽ കുറവ് വന്നത്. ഭവന, വാഹന, വിദ്യാഭ്യാസ, കാർഷിക, സ്വർണപ്പണയ, വ്യക്തിഗത വായ്പകളുടെ പലിശനിരക്കും ആനുപാതികമായി കുറയും. പണപ്പെരുപ്പം കഴിഞ്ഞ മൂന്ന് മാസമായി നാല് ശതമാനത്തിന് താഴെയാണ്.
