തൃശൂർ: ചാലക്കുടിയിൽ പെയ്ന്റ് ഗോഡൗണിൽ വൻ തീപിടുത്തം. നോർത്ത് ചാലക്കുടിയിലെ ഊക്കൻസ് പെയ്ന്റ് ഗോഡൗണിനാണ് തീ പിടിച്ചത്. പെയിന്റ് സൂക്ഷിച്ച ഭാഗത്തുനിന്നാണ് തീ പടർന്നതെന്നാണു വിവരം. രാവിലെ 8:30 ഓടുകൂടിയാണ് അപകടം സംഭവിച്ചത്.
കർട്ടൺ ക്ലോത്തുകൾ, കിടക്കകൾ, ഫർണിച്ചറുകൾ, പെയ്ന്റിങ്ങുകൾ തുടങ്ങിയ വീട്ടാവശ്യത്തിനുള്ള സാധനങ്ങൾ വിൽക്കുന്ന സ്ഥാപനമാണിത്.തീ പിടിച്ച ഉടൻ തന്നെ മറ്റു വിഭാഗങ്ങളിലേക്കും തീ ആളിപ്പടരുകയായിരുന്നു.
കൂടുതൽ അപകടം ഉണ്ടാകാതിരിക്കാനായി തൊട്ടടുത്ത ഗ്യാസ് ഗോഡൗണിൽ നിന്നും സിലിണ്ടറുകൾ നീക്കം ചെയ്തു. ഫയർഫോഴ്സും പൊലീസും നാട്ടുകാരും ചേര്ന്ന് തീയണയ്ക്കാനുള്ള ശ്രമം തുടരുകയാണ്. മാളയിൽ നിന്നും, അങ്കമാലിയിൽ നിന്നും കൂടുതൽ യൂണിറ്റ് എത്തിച്ച് തീ അണക്കാനുള്ള ശ്രമമാണ് നടക്കുന്നത്. സമീപത്ത് ഉണ്ടായിരുന്ന കടകളിലെ ജീവനക്കാരെ അടക്കം ഒഴിപ്പിച്ചിട്ടുണ്ട്.തീപിടുത്തതിന്റെ കാരണം വ്യക്തമല്ല.
