തിരുവനന്തപുരം: ഡിഫറന്റ് ആര്‍ട് സെന്ററില്‍ കായിക പരിശീലന പദ്ധതിയുടെ ഭാഗമായി കരാട്ടെ വിഭാഗം ആരംഭിക്കുന്നു. നാളെ (ചൊവ്വ) രാവിലെ 11ന് ജപ്പാനിലെ ഇന്റര്‍നാഷണല്‍ ഷോട്ടോക്കാന്‍ ഷോബുകാന്‍ കരാട്ടെ സംഘടനയുടെ സ്ഥാപകന്‍ ഗ്രാന്‍ഡ് മാസ്റ്റര്‍ കാന്‍ചോ മസായാ കൊഹാമ പരിശീലന പദ്ധതിക്ക് തുടക്കം കുറിക്കും.
ഇതിനോടനുബന്ധിച്ച് പ്രത്യേക കരാട്ടെ പ്രദര്‍ശനവും നടക്കും. ഇതാദ്യമായാണ് ഡിഫറന്റ് ആര്‍ട് സെന്ററില്‍ കരാട്ടെ പരിശീലന പദ്ധതിക്ക് തുടക്കം കുറിക്കുന്നത്. ഭിന്നശേഷിക്കുട്ടികളുടെ കായിക സമഗ്ര പുരോഗതിക്കായി നിരവധി കായിക ഇനങ്ങള്‍ പരിശീലിപ്പിക്കുന്നുണ്ട്.
ഫുട്‌ബോള്‍, അത്‌ലെറ്റിക് ഇനങ്ങള്‍, ടേബിള്‍ ടെന്നീസ്, ചെസ് തുടങ്ങിയവ ഇത്തരത്തില്‍ പരിശീലിപ്പിച്ചു വരികയാണ്. ചടങ്ങില്‍ ഫ്യൂജി ഗംഗ ജപ്പാന്‍ ചാപ്റ്റര്‍ പ്രസിഡന്റ് ജോജോ അഗസ്റ്റിന്‍, ഡിഫറന്റ് ആര്‍ട് സെന്റര്‍ എക്‌സിക്യുട്ടീവ് ഡയറക്ടര്‍ ഗോപിനാഥ് മുതുകാട്, ഇന്റര്‍വെന്‍ഷന്‍ ഡയറക്ടര്‍ ഡോ.അനില്‍നായര്‍, മാജിക് പ്ലാനറ്റ് മാനേജര്‍ സുനില്‍രാജ് സി.കെ എന്നിവര്‍ പങ്കെടുക്കും.
