തിരുവനന്തപുരം: മോഷണം നടത്തിയ ശേഷം ഉറങ്ങിപ്പോയ കള്ളനെ വിളിച്ചുണര്‍ത്തി അറസ്റ്റ് ചെയ്ത് പൊലീസ്. തിരുവനന്തപുരം ആറ്റിങ്ങലിലാണ് സംഭവം നടന്നത്. ആറ്റിങ്ങല്‍ വീരളം സ്വദേശി ബിനീഷിനെയാണ് പോലീസ് അറസ്റ്റ് ചെയ്തത് .
സിഎസ്‌ഐ സ്‌കൂളിലാണ് ബിനീഷ് മോഷണം നടത്തിയത്. ആറ്റിങ്ങല്‍ മൂന്നു മുക്കിലാണ് സ്കൂൾ പ്രവര്‍ത്തിക്കുന്നത്. ഇയാൾ മദ്യപിച്ചുകൊണ്ടാണ് മോഷണത്തിനായി എത്തിയത്. സ്കൂളിലെ പാലിയേറ്റീവ് സംഭാവന ബോക്‌സുകള്‍ പൊളിച്ച് ബിനീഷ് പണം കവരുകയായിരുന്നു.
തുടര്‍ന്ന് സ്കൂളിലെ ലോക്കര്‍ തകര്‍ക്കാന്‍ ശ്രമിച്ചെങ്കിലും കള്ളന് സാധിച്ചില്ല. അതിനു ശേഷം തൊണ്ടിമുതലുകളും സമീപത്ത് ഇയാൾ വച്ച് ഉറങ്ങിപ്പോകുകയായിരുന്നു. രാവിലെ സ്കൂളിൽ എത്തിയവരാണ് കള്ളനെ ആദ്യം കണ്ടത്. അപ്പോഴും ബോധമില്ലാതെ ഉറങ്ങുകയായിരുന്നു പ്രതി.
തുടർന്ന് സ്‌കൂള്‍ അധികൃതര്‍ ഉടന്‍ തന്നെ പൊലീസില്‍ വിവരം അറിയിക്കുകയായിരുന്നു. തുടർന്ന് ഉടൻ തന്നെ ഇയാളെ അറസ്റ്റ് ചെയ്ത് കോടതിയില്‍ ഹാജരാക്കി റിമാന്‍ഡ് ചെയ്തു.
