തിരുവനന്തപുരം: സുഹൃത്തിൻ്റെ പ്രണയ ബന്ധത്തിലെ തർക്കം പറഞ്ഞ് തീർക്കാനെത്തിയ യുവാവിന അടിച്ചു കൊന്നു. പെൺകുട്ടിയുടെ ബന്ധുക്കളാണ് യുവാവിനെ അടിച്ചുകൊന്നത്. കാമുകൻ്റെ സുഹൃത്തും കൊല്ലം ഈസ്റ്റ് കല്ലട തെക്കേമുറി സ്വദേശിയുമായ അമലാണ് (24) മരിച്ചത്. ചികിത്സയിലിരിക്കെയാണ് അമലിന്റെ മരണം.
ഈ മാസം 14 നാണ് സംഭവം നടന്നത്. വർക്കല കണ്ണമ്പയിൽ വച്ചാണ് ആക്രമണം നടന്നത്. കണ്ണമ്പ സ്വദേശിയായ പെൺകുട്ടിയും അമലിന്റെ സുഹൃത്തും പ്രണയത്തിലായിരുന്നു. ഇതിനിടെ ഈ ബന്ധം പെൺകുട്ടി അവസാനിപ്പിച്ചിരുന്നു. ഇതിനു പിന്നാലെയാണ് അമലും സുഹൃത്തിൻ്റെ ബന്ധുക്കളും പെൺകുട്ടിയുടെ വീട്ടിലെത്തുകയായിരുന്നു.
സംസാരത്തിനിടയിൽ പെൺകുട്ടിയുടെ പിതാവ് സുഹൃത്തിൻ്റെ ബന്ധുക്കളുമായി വാക്കുതർക്കത്തിലേർപ്പെടുകയായിരുന്നു. ഇത് കയ്യാങ്കളിയിലെത്തിയതോടൊണ് അമലിന് അടിയേറ്റത്. പിന്നീട് ഇവർ വീട്ടിലേക്ക് മടങ്ങിയിരുന്നു. തുടർന്ന് അടുത്ത ദിവസം അമൽ രക്തം ശർദിക്കുകയായിരുന്നു. തുടർന്ന് ഉടൻ തന്നെ അമലിനെ ആശുപത്രിയിൽ പ്രവേശിപ്പിച്ചു.
ഇയാൾ തെങ്ങിൽ നിന്ന് വീണതാണെന്നാണ് ആശുപത്രി അധികൃതരോട് ബന്ധുക്കൾ പറഞ്ഞത്. എന്നാൽ ഡോക്ടർക്ക് സംശയം തോന്നിയതിനെ തുടർന്ന് പൊലീസിൽ അറിയിക്കുകയായിരുന്നു. തുടർന്ന് പോലീസ് നടത്തിയ ചോദ്യം ചെയ്യലിലാണ് സംഭവം പുറത്തുവന്നത്. സംഭവത്തിൽ പെൺകുട്ടിയുടെ ബന്ധുക്കളായ സുരേഷ്, രാജേഷ്, അജിത് എന്നിവരെ പൊലീസ് കസ്റ്റഡിയിലെടുത്തു.
