തിരുവനന്തപുരം: തിരുവനന്തപുരം കഴക്കൂട്ടത്ത് ബൈക്കിടിച്ച് പരിക്കേറ്റ് ചികിത്സയിലായിരുന്ന വീട്ടമ്മ മരിച്ചു. കഴക്കൂട്ടം പോത്തൻകോട് ബൈപ്പാസ് റോഡിൽ കാട്ടായിക്കോണം നരിക്കൽ ജംഗ്ഷനിൽ റോഡ് മുറിച്ച് കടക്കുമ്പോളാണ് അപകടം നടന്നത്.
കാട്ടായിക്കോണം തെക്കതിൽ ബി എസ് ഭവനിൽ ഓട്ടോറിക്ഷ ഡ്രൈവറായ ബിജുവിൻ്റെ ഭാര്യ എൽ. പ്രീത (42) ആണ് മെഡിക്കൽ കോളജ് ആശുപത്രിയിൽ മരിച്ചത്. കാര്യവട്ടം യൂണിവേഴ്സിറ്റി കാമ്പസിലെ താൽക്കാലിക ജീവനക്കാരിയായ പ്രീത കഴിഞ്ഞ വെള്ളിയാഴ്ച്ച വൈകിട്ട് 6.30ന് ബസിറങ്ങി റോഡ് മുറിച്ചു കടക്കുമ്പോൾ ബൈക്ക് ഇടിച്ചുതെറിപ്പിക്കുകയായിരുന്നു.
ആശുപത്രിയിൽ പ്രവേശിപ്പിച്ച പ്രീതയ്ക്ക് ബോധം തിരിച്ചു കിട്ടിയിരുന്നില്ല. പോത്തൻകോട് പോലീസ് കേസെടുത്തു. മെഡിക്കൽ കോളേജ് ആശുപത്രി മോർച്ചറിയിൽ പോസ്റ്റ്മോർട്ടത്തിനുശേഷം മൃതദേഹം വീട്ടുവളപ്പിൽ സംസ്കരിച്ചു.
മകൾ: അനാമിക. പോത്തൻകോട് ഗവൺമെൻറ് യുപിഎസിലെ പിടിഎ അംഗമായിരുന്നു പ്രീത
