തിരുവനന്തപുരം: തിരുവനന്തപുരം വിഴിഞ്ഞത്ത് കള്ള വൗച്ചറെഴുതി റെസ്റ്റോറൻ്റ് മാനേജര് നേടിയത് 9 ലക്ഷം രൂപ. വിഴിഞ്ഞത്തെ ‘കടല്’ റെസ്റ്റോറന്റിലെ മാനേജരായ കണ്ണീര് ചിറക്കര സ്വദേശി മുഹമ്മദ് ദില്ഷാദാണ് തട്ടിപ്പ് നടത്തിയത്.
അവധിയിലുള്ള ജീവനക്കാരുടെ ശമ്പളം എഴുതിയെടുത്തും സാധനങ്ങളെത്തിക്കുന്നവരുടെ പേരില് വാങ്ങുന്ന വിലയേക്കാള് അധികവിലയെഴുതിയുമാണ് ഇയാൾ പണം തട്ടിയെടുത്തത്. കഴിഞ്ഞ ഒരു വർഷമായി ഇയാൾ തട്ടിപ്പ് നടത്തുകയായിരുന്നു.
ഇത്തരത്തിൽ ഇയാൾ ഒന്പതുലക്ഷം രൂപയാണ് കൈക്കലാക്കിയത്. സ്ഥാപനത്തിലെ ജീവനക്കാര് അവധിയെടുക്കുന്ന ദിവസം ആ ജീവനക്കാര് ജോലിയിലുണ്ടെന്ന് കാണിച്ച് അവരുടെ ശമ്പളം വൗച്ചറെഴുതി തട്ടിയെടുക്കുന്നതായിരുന്നു പ്രതിയുടെ രീതി. സംഭവത്തിൽ ഹോട്ടൽ ഉടമ നൽകിയ പരാതിയിൽ മുഹമ്മദ് ദില്ഷാദിനെ പോലീസ് അറസ്റ്റ് ചെയ്തു. അടുത്തിടെ ഉടമ നടത്തിയ പരിശോധനയിലാണ് മാനേജരുടെ തട്ടിപ്പ് വ്യക്തമായത്.
