തിരുവനന്തപുരം: കഴിഞ്ഞദിവസം കെഎസ്ആർടിസി ബസിൽ പെൺകുട്ടിക്കു നേരെയുണ്ടായ ലൈംഗിക അതിക്രമത്തിൽ പൊലീസ് കേസെടുത്തു. കഴിഞ്ഞ ദിവസം തിരുവനന്തപുരത്തു നിന്ന് വെള്ളറടയിലേക്ക് പോയ ബസിലാണ് യുവതിക്ക് നേരെ അതിക്രമം ഉണ്ടായത്. ഇതിന്റെ ദൃശ്യങ്ങൾ വൈറലായിരുന്നു.
ഇതിനു പിന്നാലെയാണ് പോലീസ് കേസ് രജിസ്റ്റർ ചെയ്തത്. സഹയാത്രികൻ പലതവണ കടന്നുപിടിച്ചതോടെ യുവതി മൊബൈലിൽ ദൃശ്യങ്ങൾ പകർത്തുകയായിരുന്നു. ഇതിനിടെ പ്രതി അപ്രതീക്ഷിതമായി പെൺകുട്ടിയുടെ വസ്ത്രത്തിനുള്ളിൽ കൈകടത്തി അതിക്രമം നടത്തുകയായിരുന്നു. ഈ സമയം പെൺകുട്ടി ഇയാളുടെ കൈ തട്ടിയെറിയുകയും ഇയാളുടെ മുഖത്ത് അടിക്കുകയും ചെയ്തു.
തുടർന്ന് ഒന്നുകിൽ പൊലീസ് സ്റ്റേഷനിലേക്ക് പോകണമെന്നും അല്ലെങ്കിൽ പ്രതിയെ ബസിൽ നിന്ന് ഇറക്കി വിടണമെന്നും പെൺകുട്ടി ആവശ്യപ്പെട്ടു. ഇതോടെ കണ്ടക്ടർ എത്തി പ്രതിയെ പേയാട് ഭാഗത്ത് ഇറക്കിവിടുകയായിരുന്നു. അതേസമയം സംഭവം നടക്കുമ്പോൾ മറ്റു യാത്രക്കാർ പ്രതികരിച്ചിരുന്നില്ല.
തുടർന്ന് പെൺകുട്ടി ദൃശ്യങ്ങൾ പുറത്തുവിട്ടതിനു പിന്നാലെയാണ് പോലീസ് സ്വയമേ കേസെടുക്കാൻ തീരുമാനിച്ചത്. പ്രതിയെ കണ്ടെത്താൻ ശ്രമം തുടങ്ങിയെന്ന് പൊലീസ് പറഞ്ഞു.
