തിരുവനന്തപുരം: തിരുവനന്തപുരത്ത് വീടിന് സമീപം പാർക്ക് ചെയ്ത കാർ കത്തി നശിച്ചു. ഇന്നലെ വൈകിട്ടായിരുന്നു സംഭവം നടന്നത്. മുട്ടയ്ക്കാട് സ്വാതി ഭവനിൽ സരിതയുടെ വാഹനമാണ് കത്തിനശിച്ചത്.
വെണ്ണിയൂർ നെല്ലിവിള ആരിയോട്ടുകോണത്തെ വീടിനു മുന്നിൽ വച്ചാണ് അപകടം നടന്നത്. ഇന്നലെ വൈകുന്നേരം ഇവരുടെ ഒരു ബന്ധു കാർ കൊണ്ടുപോയിരുന്നു. തിരികെ വന്ന ശേഷം വീടിനു സമീപം നിർത്തിയിട്ടിരുന്നപ്പോഴാണ് സംഭവം നടന്നത്.
ബന്ധു പോയി അൽപ നേരത്തിന് ശേഷം വാഹനത്തിനു നിന്ന് പുക ഉയരാൻ തുടങ്ങി. ഇത് കണ്ട് നോക്കിയപ്പോഴാണ് ബോണറ്റ് ഭാഗത്ത് തീപിടിക്കുന്നതായി കണ്ടത്. ഉടൻ തന്നെ സമീപവാസി വെള്ളമൊഴിച്ച് തീ കെടുത്തിയതിനാൽ വലിയ അപകടം ഉണ്ടായില്ല.
തുടർന്ന് ഫയർഫോഴ്സ് എത്തി സുരക്ഷാ നടപടികൾ സ്വീകരിച്ചു. ഷോർട് സർക്യൂട്ട് ആയിരിക്കാം അപകട കാരണമെന്നാണ് പ്രാഥമിക വിവരം. അപകടത്തിൽ കാറിന്റെ എൻജിൻ ഭാഗവും മുൻവശവും കത്തുകയും ഗ്ലാസ് പൊട്ടിത്തെറിക്കുകയും ചെയ്തു.
