തിരുവനന്തപുരം: തിരുവനന്തപുരം വർക്കലയിൽ ഓൺലൈൻ ടാക്സി ഡ്രൈവർക്ക് മർദനമെന്ന് പരാതി. ഓൺലൈൻ ടാക്സി ഡ്രൈവറെ തടഞ്ഞുനിർത്തി ആക്രമിക്കാൻ ശ്രമിച്ചെന്നും ടയറുകളിൽ അള്ള് വെച്ച് അപായപ്പെടുത്താൻ ശ്രമിച്ചെന്നുമാണ് പരാതിയിൽ പറയുന്നത്. കഴിഞ്ഞ ദിവസവും ഇവിടെ വിനോദസഞ്ചാരികളായ വിദേശ വനിതകളുമായി എത്തിയ ടൂർ ഓപ്പറേറ്ററുടെ വാഹനത്തെ പ്രദേശത്തെ ടാക്സി ഡ്രൈവർമാർ തടഞ്ഞ് ഭീഷണിപ്പെടുത്തിയിരുന്നു.
ഈ മാസം 18ന് വർക്കല ഹെലിപാടിന് സമീപത്തായിരുന്നു സംഭവം നടന്നത്. പത്തനംതിട്ട സ്വദേശി റിയാസിനെയാണ് പ്രാദേശിക ടാക്സി ഡ്രൈവർമാർ തടഞ്ഞത്. വർക്കലയിൽ നിന്ന് ടൂറിസ്റ്റുകളെയും കൊണ്ട് ആലപ്പുഴയിലേക്ക് പോകാൻ തുടങ്ങിയപ്പോഴായിരുന്നു ആക്രമണം.
ടൂറിസ്റ്റുകളെ കൊണ്ടുപോകാനുള്ള പെർമിറ്റ് വാഹനത്തിന് ഇല്ലെന്ന് പറഞ്ഞാണ് ഇവർ വാഹനം തടഞ്ഞത്. ഇവരുടെ ഒപ്പം ഒരു പോലീസ് ഉദ്യോഗസ്ഥൻ കൂടെ ഉണ്ടായിരുന്നുവെന്നാണ് റിയാസ് പറയുന്നത്. വാഹനം തടഞ്ഞുനിർത്തുകയും അസഭ്യം പറയുകയും വാഹനം മുന്നോട്ട് എടുത്തപ്പോൾ അള്ള് വെക്കുകയും ചെയ്തുവെന്നാണ് പരാതിയിൽ പറയുന്നത്.
