തിരുവനന്തപുരം: തിരുവനന്തപുരം വെള്ളനാട് വാഹനാപകടത്തിൽ പരിക്കേറ്റ ചികിത്സയിലായിരുന്ന വയോധിക മരിച്ചു. ഇന്നലെ പുലർച്ചെയാണ് വെള്ളനാട് സരസ്വതി വിദ്യാലയത്തിന് സമീപം പ്രഭാതസവാരിക്കിറങ്ങിയ വയോധികരെ ബൈക്കിടിച്ചു തെറിപ്പിച്ചത്. വെള്ളനാട് സ്വദേശി ഗീതയെയും ബന്ധുവായ സുധയെയുമാണ് ബൈക്കിടിച്ചു തെറിപ്പിച്ചത്.
ഗുരുതരമായി പരുക്കേറ്റ ഗീത ആശുപത്രിയിൽ ചികിത്സയിലിരിക്കയാണ് മരിച്ചത്. അപകടത്തിന് ശേഷം ബൈക്ക് നിർത്താതെ പോകുകയായിരുന്നു.പിന്നീട് ബൈക്കോടിച്ചിരുന്ന വെള്ളനാട് സ്വദേശി നിതിൻ കൃഷ്ണയെ പൊലീസ് കസ്റ്റഡിയിലെടുത്തു. അപകടമുണ്ടാക്കിയതിനും അമിതവേഗത്തിനുമാണ് പൊലീസ് കേസെടുത്തിരിക്കുന്നത്. വളവ് തിരിഞ്ഞ് വന്നപ്പോൾ ആളിനെ കണ്ട് വാഹനത്തിന്റെ നിയന്ത്രണം നഷ്ടമായതാണെന്ന് നിതിൻ പൊലീസിന് മൊഴി നൽകി.
