തിരുവനന്തപുരം: യുഡിഎഫിന്റെ രണ്ട് ഗ്യാരണ്ടികൾ ഉടനെന്ന് മുഖ്യമന്ത്രി വി ഡി സതീശൻ. യുഡിഎഫ് സര്ക്കാരിന്റെ ആദ്യ മന്ത്രിസഭ യോഗത്തിലാണ് മുഖ്യമന്ത്രി ഇക്കാര്യം പറഞ്ഞത്. കെഎസ്ആർടിസി ബസുകളിലെ സ്ത്രീകൾക്കുള്ള സൗജന്യ യാത്ര, വയോജനങ്ങൾക്കായുള്ള പ്രത്യേക വകുപ്പുമാണ് ഇന്ന് പ്രഖ്യാപിച്ചത്.
ജൂണ് 15മുതല് കെഎസ്ആര്ടിസിയില് സ്ത്രീകളുടെ യാത്ര സൗജന്യമായിരിക്കും. വയോജനങ്ങൾക്കായി പ്രത്യേക വകുപ്പ് രൂപീകരിക്കുമെന്നും വി ഡി സതീശൻ അറിയിച്ചു. വയോജന വകുപ്പ് രാജ്യത്ത് ആദ്യമാണെന്ന് ചൂണ്ടിക്കാട്ടിയ മുഖ്യമന്ത്രി സമൂഹം പരിഷ്കൃതമാകമമെങ്കിൽ മുതിർന്നവരെ സംരക്ഷിക്കണമെന്നും കൂട്ടിച്ചേർത്തു. കൂടാതെ ആശമാരുടെ ഓണറേറിയം ആദ്യ ഘട്ടമെന്ന നിലയ്ക്ക് 3000 രൂപയായി വർധിപ്പിക്കാൻ തീരുമാനിച്ചതായും അദ്ദേഹം പറഞ്ഞു.
സാമ്പത്തിക നില മെച്ചപ്പെട്ടാല് ഇനിയും കൂട്ടുമെന്നും ആശമാര്ക്ക് യുഡിഎഫ് നല്കിയ വാക്ക് പാലിച്ചെന്നും വി ഡി സതീശന് മുഖ്യമന്ത്രിയായ ശേഷമുള്ള ആദ്യ വാര്ത്താ സമ്മേളനത്തില് വ്യക്തമാക്കി. മന്ത്രിസഭ യോഗത്തിനുശേഷം നടത്തിയ വാര്ത്തസമ്മേളനത്തിലാണ് മുഖ്യമന്ത്രി വി ഡി സതീശന് ഇക്കാര്യം അറിയിച്ചത്. വിശദാംശങ്ങൾ പിന്നീട് പ്രഖ്യാപിക്കുമെന്നും അദ്ദേഹം പറഞ്ഞു.
അങ്കണവാടി ജീവനക്കാരുടെ വേതനത്തില് 1000 രൂപയുടെ വര്ധനയുണ്ട്. പാചക തൊഴിലാളികള്ക്ക് 1000 രൂപ കൂട്ടി. പ്രീ പ്രൈമറി ആയമാര്ക്കും 1000 രൂപ കൂട്ടി. സാമ്പത്തിക സ്ഥിതി മെച്ചപ്പെടുമ്പോള് കൂടുതൽ സഹായമുണ്ടാകുമെന്നും മുഖ്യമന്ത്രി പറഞ്ഞു. സെക്രട്ടറിയേറ്റിലെ മാധ്യമവിലക്കും പുനഃപരിശോധിക്കുമെന്നും അദ്ദേഹം വ്യക്തമാക്കി.
