തിരുവനന്തപുരം: തിരുവനന്തപുരത്ത് നിയന്ത്രണം തെറ്റിയ ബൈക്കിൽ നിന്ന് തെറിച്ചു വീണു യുവാവ് മരിച്ചു. കാട്ടായിക്കോണം കോണത്ത് രോഹിണിയിൽ വിജയൻ – വത്സല ദമ്പതികളുടെ മകൻ അർജുൻ വിജയ് (29) ആണ് മരിച്ചത്. ഓമന നഗർ ഇടറോഡിൽ നിന്നു കാട്ടായിക്കോണം മെയിൻ റോഡിലേക്കു കടക്കവേയാണ് ബൈക്ക് മറിഞ്ഞു തെറിച്ചു വീണത്.
ഇന്ന് ഉച്ചക്ക് 2.15നായിരുന്നു അപകടം. ബൈക്കോടിക്കുമ്പോൾ ഫിറ്റ്സ് വന്നു ഇടറോഡ് അവസാനിക്കുന്ന വലതുഭാഗത്തെ മതിലിൽ ശക്തിയായി ഇടിച്ചു ബൈക്ക് പിന്നിലേക്ക് തെറിച്ചു വീഴുകയായിരുന്നു. റോഡിലേക്ക് തെറിച്ചു വീണ അർജുനെ തിരുവനന്തപുരത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരിക്കുകയായിരുന്നു.
മെഡിക്കൽകോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം നാളെ ഉച്ചക്ക് വീട്ടുവളപ്പിൽ സംസ്കരിയ്ക്കും.ഇൻഡസ് ഇൻഡ് ബാങ്കിലെ ജീവനക്കാരനാണ്.
ഭാര്യ അഥീനദേവീ ചേങ്കോട്ടുകോണം എസ് എൻ പബ്ലിക് സ്കൂളിലെ അധ്യാപികയാണ് . ഇവരുടെ രണ്ടാം വിവാഹവാർഷികമായിരുന്നു ഇന്ന്.
