ഊർജ്ജമേഖലയിൽ വൻ കുതിച്ചുചാട്ടം: അണ്ടൂർക്കോണം ബാറ്ററി സ്റ്റോറേജ് പദ്ധതി നിർമ്മാണം വൈദ്യുതി മന്ത്രി വിലയിരുത്തി
കഴക്കൂട്ടം: സംസ്ഥാനത്തെ രാത്രികാല വൈദ്യുതി ലഭ്യതക്കുറവിന് ശാശ്വത പരിഹാരം കാണുന്നതിനായി കേരള സംസ്ഥാന വൈദ്യുതി ബോർഡ് നടപ്പിലാക്കുന്ന വൈദ്യുതി സംഭരണ സംവിധാനത്തിന്റെ നിർമ്മാണ പുരോഗതി വിലയിരുത്തുന്നതിനായി വൈദ്യുതി മന്ത്രി സണ്ണി ജോസഫ് അണ്ടൂർക്കോണം 220 കെ.വി സബ്സ്റ്റേഷൻ സന്ദർശിച്ചു. ഇന്ന് വൈകുന്നേരം 4 മണിയോടെയാണ് മന്ത്രി പദ്ധതി പ്രദേശം സന്ദർശിച്ചത്.
യു.ഡി.എഫ് സർക്കാരിന്റെ 100 ദിന കർമ്മപരിപാടിയിൽ ഉൾപ്പെടുത്തിയാണ് ഈ പദ്ധതി നടപ്പിലാക്കുന്നത്. അണ്ടൂർക്കോണം സബ്സ്റ്റേഷൻ വളപ്പിലെ മൂന്നര ഏക്കർ സ്ഥലത്ത് ഒരുങ്ങുന്ന 40 മെഗാവാട്ട് (160 മെഗാവാട്ട് അവർ) ശേഷിയുള്ള ഈ കേന്ദ്രത്തിന്റെ നിർമ്മാണം ഈ വർഷം ഡിസംബർ 15-ഓടെ പൂർത്തിയാകും.
ദേശീയ താപവൈദ്യുതി കോർപ്പറേഷന്റെ (എൻ.ടി.പി.സി) ഉപകമ്പനിയായ ‘എൻ.ടി.പി.സി ഗ്രീൻ എനർജി ലിമിറ്റഡ്’ ആണ് പദ്ധതിയുടെ നിർവ്വഹണം നടത്തുന്നത്. യു സോളാർ കമ്പനിക്കാണ് നിർമ്മാണ ചുമതല. ഏകദേശം 180 കോടി രൂപ ചെലവ് പ്രതീക്ഷിക്കുന്ന ഈ പദ്ധതിക്ക് വൈദ്യുതി ബോർഡ് നേരിട്ട് തുക മുടക്കേണ്ടതില്ല എന്ന പ്രത്യേകതയുമുണ്ട്. 12 വർഷത്തെ കരാർ അടിസ്ഥാനത്തിലാണ് പദ്ധതി നടപ്പിലാക്കുന്നത്. പകൽ സമയങ്ങളിൽ സംസ്ഥാനത്ത് ലഭ്യമാകുന്ന അധിക സൗരോർജ്ജം ഉപയോഗിച്ച് ബാറ്ററി ചാർജ്ജ് ചെയ്യുകയും, വൈദ്യുതി ആവശ്യകതയേറുന്ന വൈകുന്നേരങ്ങളിൽ 4 മണിക്കൂർ വരെ തിരികെ വിതരണം ചെയ്യുകയുമാണ് പദ്ധതിയിലൂടെ ലക്ഷ്യമിടുന്നത്.
സംസ്ഥാനത്ത് നിലവിൽ നിർമ്മാണത്തിലുള്ള നാല് ബാറ്ററി സ്റ്റോറേജ് കേന്ദ്രങ്ങളിൽ ഒന്നാണ് അണ്ടൂർക്കോണത്ത് ഒരുങ്ങുന്നത്. ഇതുകൂടാതെ മയിലാട്ടി (കാസർഗോഡ് – 125 മെഗാവാട്ട്), ബ്രഹ്മപുരം (250 മെഗാവാട്ട്), മുള്ളേരിയ (കാസർഗോഡ്) എന്നിവിടങ്ങളിലാണ് മറ്റ് പദ്ധതികൾ പുരോഗമിക്കുന്നത്. നിലവിൽ അണ്ടൂർക്കോണത്ത് നിർമ്മാണത്തിന്റെ 30 മുതൽ 35 ശതമാനം വരെ പണികൾ പൂർത്തിയായിട്ടുണ്ട്. പദ്ധതി സമയബന്ധിതമായി പൂർത്തിയാക്കാൻ മന്ത്രി ഉദ്യോഗസ്ഥർക്ക് നിർദ്ദേശം നൽകി.
കെ.എസ്.ഇ.ബി സി.എം.ഡി രാജമാണിക്യം, പുനരുപയോഗ ഊർജ്ജ വിഭാഗം ഡയറക്ടർ രാജൻ, പ്രസരണ വിഭാഗം ഡയറക്ടർ ശിവദാസൻ, അസിസ്റ്റന്റ് എക്സിക്യൂട്ടീവ് എഞ്ചിനീയർ അരുൺ ജി.സി തുടങ്ങി വൈദ്യുതി ബോർഡിലെ ഉന്നത ഉദ്യോഗസ്ഥരും യൂണിയൻ പ്രതിനിധികളും മന്ത്രിയോടൊപ്പമുണ്ടായിരുന്നു. ചടങ്ങിൽ അണ്ടൂർക്കോണം ഗ്രാമപഞ്ചായത്ത് പ്രസിഡന്റ് അർച്ചന, ഡി.സി.സി വൈസ് പ്രസിഡന്റ് അഡ്വ. മുനീർ, മണ്ഡലം കോൺഗ്രസ് കമ്മിറ്റി പ്രസിഡന്റ് മുബാറക്ക്, ഗ്രാമപഞ്ചായത്ത് അംഗങ്ങൾ എന്നിവരും മറ്റ് ജനപ്രതിനിധികളും പങ്കെടുത്തു.
