ശ്രീനഗർ: ജമ്മു കശ്മീരിൽ ഭീകരാക്രമണം. തീർഥാടകർ സഞ്ചരിച്ച ബസിനു നേരെയാണ് ഭീകരാക്രമണം നടന്നത്. അപകടത്തിൽ 10 പേർ മരിച്ചു. 33 പേർക്ക് പരിക്കേറ്റതായാണ് വിവരം. ജമ്മു കശ്മീരിലെ റിയാസി ജില്ലയിലെ ഒരു ദേവാലയത്തിൽ നിന്ന് തീർഥാടകരുമായി പോയ ബസിനുനേരെയാണ് ആക്രമണം നടന്നത്.
ഇന്നലെയാണ് സംഭവം. കൊല്ലപ്പെട്ട തീർത്ഥാടകർ യുപി സ്വദേശികളെന്നാണ് പൊലീസ് പറയുന്നത്. ആളുകളെ തിരിച്ചറിഞ്ഞിട്ടില്ല. തീർത്ഥാടകരുടെ വാഹനത്തിനു നേരെ ഭീകരർ വെടിയുതിർക്കുകയായിരുന്നു. വെടിവെപ്പിനെ തുടർന്ന് ഡ്രൈവർക്ക് ബസിൻ്റെ ബാലൻസ് നഷ്ടപ്പെട്ട് തോട്ടിലേക്ക് വീഴുകയായിരുന്നു. വാഹനത്തിന്റെ ഡ്രൈവർ ഉൾപ്പെടെ നാല് പേർ വെടിയേറ്റാണ് മരിച്ചത്. മുഖംമൂടി ധരിച്ച രണ്ട് ഭീകരരാണ് ബസിനുനേരെ വെടിയുതിർത്തതെന്നാണ് വിവരം.
