തൃശൂർ: ജോലി ചെയ്ത സ്ഥാപനത്തിൽ നിന്ന് കോടികളുടെ തിരിമറി നടത്തി യുവതി മുങ്ങി. 19.94 കോടി രൂപയുമായി യുവതി കടന്നുവെന്നാണ് പരാതിയിൽ പറയുന്നത്. കൊല്ലം സ്വദേശി ധന്യ മോഹന് ആണ് പണം തട്ടിയ ശേഷം കടന്നുകളഞ്ഞത്. വലപ്പാട് മണപ്പുറം ഫിനാൻസ് ലിമിറ്റഡിൽ 18 വർഷത്തോളമായി അസിസ്റ്റന്റ് ജനറൽ മാനേജർ ആയി ജോലി ചെയ്തു വരികയായിരുന്നു യുവതി.
2019 മുതൽ ധന്യ കമ്പനിയിൽ തട്ടിപ്പ് നടത്താൻ ആരംഭിച്ചുവെന്നാണ് അറിയുന്നത്. മണപ്പുറം ഫിനാൻസ് ലിമിറ്റഡ് കമ്പനിയിൽ നിന്നും വ്യാജ ലോണുകൾ ഉണ്ടാക്കി കമ്പനിയുടെ ഡിജിറ്റൽ പേഴ്സ്ണൽ ലോൺ അക്കൗണ്ടിൽ നിന്നും അച്ഛന്റെയും സഹോദരന്റെയും വിവിധ അക്കൗണ്ടുകളിലേക്ക് പണം ട്രാൻസ്ഫർ ചെയ്താണ് തട്ടിപ്പ് നടത്തിയത്.
തട്ടിയെടുത്ത പണം ഉപയോഗിച്ച് സ്ഥലവും വീടും വാങ്ങിയതായും ആഢംബര ജീവിതം നയിച്ചതായും കണ്ടെത്തിയിരുന്നു. പരാതിയുടെ അടിസ്ഥാനത്തിൽ തട്ടിപ്പിനെ കുറിച്ച് അന്വേഷിക്കാൻ പ്രത്യേക സംഘത്തെ നിയോഗിച്ചു.
