തിരുവനന്തപുരം: മംഗലപുരത്ത് വീട്ടമ്മയുമായി അവിഹിതബന്ധം ആരോപിച്ച് യുവാവിന് മർദ്ദനം. അണ്ടൂർക്കോണം ചേമ്പാല വാർവിളാകത്ത് പണയിൽ വീട്ടിൽ അനസ് (28) നാണ് മർദ്ദനത്തിൽ പരിക്കേറ്റത്. സംഭവത്തിൽ രണ്ടുപേരെ മംഗലാപുരം പോലീസ് അറസ്റ്റ് ചെയ്തു. അണ്ടൂർക്കോണം സ്വദേശികളായ റാഷിദ് (29), ഇസ്ഹാക്ക് (30) എന്നിവരാണ് അറസ്റ്റിലായത്. മൂന്നു പ്രതികൾ കൂടി സംഭവത്തിൽ ഉൾപ്പെട്ടതായി മംഗലപുരം പോലീസ് പറഞ്ഞു. ഇക്കഴിഞ്ഞ ഞായറാഴ്ച രാത്രി 10 മണിയോടുകൂടിയായിരുന്നു സംഭവം. പള്ളിപ്പുറം ജംഗ്ഷനിൽ നിൽക്കവേ രണ്ട് സ്കൂട്ടറിലായി എത്തിയ സംഘം അനസിനെ ബലമായി കൂട്ടിക്കൊണ്ടു പോയി പറമ്പിൽ പാലത്ത് ആളൊഴിഞ്ഞ സ്ഥലത്തെത്തിച്ച് ക്രൂരമായി മർദ്ദിച്ചു എന്നാണ് പരാതി. നേരത്തെ വീട്ടമ്മയുടെ ഭർത്താവിനെ അനസ് മർദ്ദിച്ചതായി നാട്ടുകാർ പറഞ്ഞു. സ്ഥിരമായി ഈ വീട്ടിൽ അനസ് വന്നു പോകാറുണ്ടെന്നും നാട്ടുകാർ പറയുന്നു. പലവട്ടം നാട്ടുകാർ ഇടപെട്ട് അനസിനെ വിലക്കിയിരുന്നു.
