കഴക്കൂട്ടം: മെഡിക്കൽ സ്റ്റോറിൽ മരുന്നു വാങ്ങാൻ എത്തിയ വീട്ടമ്മയുടെ കൈയിലിരുന്ന ഒൻപത് മാസം പ്രായമുള്ള പെൺകുഞ്ഞിനെ തട്ടിയെടുക്കാൻ ശ്രമിച്ച ആസാം സ്വദേശിയെ കഴക്കൂട്ടം പൊലീസ് കസ്റ്റഡിയിലെടുത്തു.
പിടിവലിയിൽ തറയിൽ വീണ കുഞ്ഞിന്റെ വായിലും തടുക്കാൻ ശ്രമിച്ച അമ്മൂമ്മയ്ക്കും പരിക്കുണ്ട്. ഇന്നലെ രാത്രി എട്ടര മണിയോടെ കഴക്കൂട്ടത്താണ് സംഭവം. കഴക്കൂട്ടം സ്വദേശിനിയായ ഹാജു (30) അമ്മൂമ്മയായ നസീറ (60) എന്നിവരാണ് കുഞ്ഞിനെ കൂട്ടി കഴക്കൂട്ടത്ത് എത്തിയത്. അവിടെയുണ്ടായിരുന്ന ആസാം സ്വദേശി ഹാജുവിന്റെ പക്കലിരുന്ന കുഞ്ഞിന്റെ കൈപിടിച്ചു വലിച്ചതോടെ വീട്ടമ്മയുടെ നിലവിളിക്കേട്ടു സമീപത്തുണ്ടായിരുന്ന ഓടി കൂടി ഇതിനിടയിൽ നസീറ കുഞ്ഞിനെ ഏറ്റുവാങ്ങുന്നതിനിടയിൽ നസീറ കുഞ്ഞിനെ കൊണ്ടു നിലത്തു വീണു.
പരിക്കേറ്റ കുഞ്ഞിനെ സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവമറിഞ്ഞ് കഴക്കൂട്ടം എ.സി നിയാസിന്റെ നേതൃത്വത്തിലുള്ള പൊലീസ് സ്ഥലത്ത് എത്തി ആസാമിയെ കസ്റ്റഡയിലെടുത്തു ചോദ്യം ചെയ്തു വരുന്നു. ആസാം സ്വദേശി മദ്യലഹരിയിൽ ആയിരുന്നതായും ചോദ്യം ചെയ്താലെ കൂടുതൽ വ്യക്തത വരുകയുള്ളുവെന്ന് പൊലീസ് പറഞ്ഞു
