തിരുവനന്തപുരം: തിരുവനന്തപുരം ഉള്ളൂരിൽ വൃദ്ധയ്ക്ക് ക്രൂര മർദ്ദനം. അയൽവാസിയാണ് വൃദ്ധയെ അതിക്രൂരമായി ആക്രമിച്ചത്. അതിർത്തി തർക്കത്തിന്റെ പേരിലാണ് മർദനം. ഉള്ളൂർ പുലയനാർക്കോട്ടയിൽ 62 കാരിയായ ഉഷയ്ക്കാണ് മർദ്ദനമേറ്റത്.
അയൽവാസിയായ സന്ദീപാണ് ഉഷയെ മർദിച്ചത്. ഉഷയെ സന്ദീപ് ക്രൂരമായി ആക്രമിക്കുന്നതിന്റെ സിസിടിവി കാമറ ദൃശ്യം പുറത്തുവന്നു. ഉഷയുടെ വീടിന് മുന്നിൽ മതിലു കെട്ടിയപ്പോൾ വഴിക്ക് വീതി കുറഞ്ഞു പോയി എന്ന് പറഞ്ഞായിരുന്നു മർദ്ദനം.
പ്രതിക്കെതിരെ പൊലീസ് വധശ്രമത്തിന് കേസെടുത്തു. വീട്ടിനുമുന്നിൽ നിന്ന ഉഷയെ അയൽവാസിയായ സന്ദീപ് കല്ലെടുത്ത് ഇടിച്ച് മർദിക്കുകയായിരുന്നു. ആക്രമണത്തിൽ ഉഷയ്ക്ക് തലയ്ക്ക് ഗുരുതരമായി പരിക്കേറ്റു. ഉഷ നിലവിൽ മെഡിക്കൽ കോളേജിൽ ICU ൽ ചികിത്സയിൽ തുടരുകയാണ്.
