തിരുവനന്തപുരം: തിരുവനന്തപുരം വിഴിഞ്ഞത്ത് ഹാർബറിൽ ഗർത്തം രൂപപ്പെട്ടു. വിഴിഞ്ഞം മത്സ്യബന്ധന തുറമുഖത്തോടനുബന്ധിച്ച ബെർത്തിൻ്റെ മധ്യഭാഗത്തെ കോൺക്രീറ്റാണ് തകർന്ന് വീണത്. കോസ്ററൽ പൊലീസിനായി നിർമിക്കുന്ന ബെർത്തിൻ്റെ നിർമ്മാണം സമീപത്ത് നടക്കുകയായിരുന്നു. ഇതിനിടെയാണ് സമീപത്തെ പഴയ ബെർത്തിൽ കുഴി രൂപപ്പെട്ടത്.
കാലപഴക്കം മൂലമാണ് കോൺക്രീറ്റ് തകർന്ന് വൻ ഗർത്തം രൂപപ്പെട്ടതെന്നാണ് നിഗമനം. ബെർത്തിന് അടിവശത്ത് കടലാണ്. ഏകദേശം രണ്ടാൾ താഴ്ചയിലാണ് കുഴി രൂപപ്പെട്ടത്. ഇത് മത്സ്യത്തൊഴിലാളികൾക്കും ഭീഷണിയാണ്. മത്സ്യബന്ധന തുറമുഖത്തോടനുബന്ധിച്ച് പണിത ലേലപ്പുര, ബോട്ട് ഷെഡ് ഇവയോട് ചേർന്ന് കടലിലേക്ക് നീണ്ടു നിൽക്കുന്ന ബെർത്തിലാണ് കുഴി രൂപപ്പെട്ടിരിക്കുന്നത്.
ഇതോടെ കോസ്റ്റൽ പൊലീസിൻ്റെ ബെർത്ത് നിർമാണവും നിലച്ചിരിക്കുകയാണ്. തീരദേശ പൊലീസിൻ്റെ ബോട്ട് നിർത്താനുള്ള പുതിയ ബെർത്തു നിർമാണത്തിനായി ക്രെയിൻ എത്തിച്ച് പഴയ ബെർത്തിൽ കയറിയപ്പോഴാണ് അപകടം നടന്നത്.
