കൊച്ചി: എറണാകുളം ഗവ.മെഡിക്കൽ കോളെജിന് സമീപം മനുഷ്യൻ്റെ അസ്ഥികൂടം കണ്ടെത്തി. കാളംകുളം റോഡിൽ സ്വകാര്യ വ്യക്തിയുടെ സ്ഥലത്ത് നിന്നാണ് അസ്ഥികൂടം കണ്ടെത്തിയത്. പുല്ല് വളർന്നു കിടന്ന പറമ്പ് വൃത്തിയാക്കുന്നതിനിടെയാണ് സംഭവം. തലയോട്ടിക്ക് ഒരു വർഷത്തോളം പഴക്കം സംശയിക്കുന്നുണ്ട്.
തൂങ്ങി മരിച്ചതാവാനാണ് സാധ്യതയെന്ന് പൊലീസ് പറഞ്ഞു. തൊട്ടടുത്ത മരത്തിൽ ലുങ്കി മുണ്ട് കെട്ടി കുരുക്കിട്ട നിലയിൽ കണ്ടെത്തി. തൊട്ട് താഴെ തലയോട്ടിയും അരമീറ്റർ മാറി ഉടലുമാണ് കിടന്നിരുന്നത്. സമീപത്ത് നിന്നും ഒരു ബാഗും, ബാഗിൽ ഒരു ഷർട്ട്, മൊബൈൽ, ചാർജർ തുടങ്ങിയവ കണ്ടെത്തി.
തൃക്കാക്കര അസിസ്റ്റന്റ് കമ്മീഷണർ പി.വി ബേബിയുടെ നേതൃത്വത്തിൽ സ്ഥലത്ത് പരിശോധന നടത്തി. തലയോട്ടി വിശദമായ പരിശോധനകൾക്ക് അയക്കും. സംഭവത്തിൽ പൊലീസ് കേസെടുത്തിട്ടുണ്ട്. സ്ഥലത്ത് നിന്ന് തലയോട്ടിക്ക് പുറമെ ദ്രവിച്ച ശരീര ഭാഗങ്ങളും കണ്ടെത്തിയിട്ടുണ്ട്.
