മലപ്പുറം: മലപ്പുറം തുവ്വൂരിൽ നിന്നും ഈ മാസം പതിനൊന്നാം തീയതി കാണാതായ കൃഷിഭവൻ ജീവനക്കാരി സുജിതയുടെ മൃതദേഹം അയൽവാസിയുടെ വീട്ടുവളപ്പിൽ കുഴിച്ചിട്ട നിലയിൽ കണ്ടെത്തി.സുഹൃത്ത് കൂടിയായ വിഷ്ണുവിന്റെ വീട്ടുവളപ്പിലെ മാലിന്യക്കുഴിയിൽ നിന്നാണ് ശവശരീരം കണ്ടെത്തിയത്. ഒരേ പഞ്ചായത്തിലെ താൽക്കാലിക ജീവനക്കാരാണ് ഇരുവരും.
സംഭവത്തെ തുടർന്ന് വിഷ്ണു, വിഷ്ണുവിന്റെ രണ്ടു സഹോദരന്മാർ, പിതാവ്, വിഷ്ണുവിന്റെ ഒരു സുഹൃത്ത് എന്നിവരെ പോലീസ് അറസ്റ്റ് ചെയ്തു.സുജിതയുടെ മൊബൈൽ ഫോണിൽ നിന്നും അവസാനം വിളിച്ചിട്ടുള്ളത് വിഷ്ണുവിനെയാണ്.
മൊബൈൽ ടവർ ലൊക്കേഷൻ കേന്ദ്രീകരിച്ചു നടത്തിയ അന്വേഷണവും എത്തിയത് വിഷ്ണുവിന്റെ പരിസര പ്രദേശത്തേക്ക് തന്നെയാണ്.സുജിതയും വിഷ്ണുവും തമ്മിൽ പണമിടപാടുകൾ ഉണ്ടായിരുന്നതായും നാട്ടുകാർ പറയുന്നു.ഇതിന്റെ അടിസ്ഥാനത്തിലാണ് മേല്പറഞ്ഞ അഞ്ചുപേരെ കസ്റ്റഡിയിലെടുത്തത്.നിർണായക വിവരങ്ങൾ ഇവരെ ചോദ്യം ചെയ്ത ശേഷം മാത്രമേ പറയാനാകൂ എന്ന് പോലീസ് സംഘം പറഞ്ഞു.
