ഇടുക്കി: സംസ്ഥാനത്ത് വൈദ്യുതി നിരക്ക് ഇനിയും കൂട്ടേണ്ട സാഹചര്യമാണ് നിലവിലുള്ളതെന്ന് വൈദ്യുതി മന്ത്രി കെ കൃഷ്ണൻകുട്ടി. വൈദ്യുതി നിരക്കില് ചെറിയ വർദ്ധനവ് വേണ്ടി വരുമെന്നാണ് കരുതുന്നതെന്ന് മന്ത്രി പറഞ്ഞു. പുറത്തു നിന്നും വൈദ്യുതി വാങ്ങേണ്ടി വരുന്ന അവസ്ഥയാണ് നിലവിലുള്ളത്. ഇതിനാലാണ് നിരക്ക് വർധിപ്പിക്കേണ്ടി വരുന്നത്. എന്നാൽ ചെറിയ തോതിലുള്ള വർദ്ധനവ് മാത്രമേ ഉണ്ടാകുവെന്നും മന്ത്രി വ്യക്തമാക്കി.
വില വർധനവ് തീരുമാനിക്കുന്നത് റഗുലേറ്ററി കമ്മിഷനായിരിക്കും. വൈദ്യുതി പുറത്ത് നിന്ന് വാങ്ങുമ്പോള് അവരാണ് വില നിശ്ചയിക്കുന്നത്. അതിനു അനുപാതികമായിയാകും വില നിശ്ചയിക്കുക. ഉപഭോക്താവിനെ ബുദ്ധിമുട്ടിക്കാതിരിക്കാനുള്ള നടപടിയാണ് സ്വീകരിക്കുക. എന്നാൽ ഇറക്കുമതി കൽക്കരി ഉപയോഗിക്കണമെന്ന കേന്ദ്ര സർക്കാർ നിർദേശമാണ് നിലവിൽ 17 പൈസ വർദ്ധിപ്പിക്കാൻ കാരണമെന്നും മന്ത്രി കൂട്ടിച്ചേർത്തു.
