തിരുവനന്തപുരം: തിരുവനന്തപുരത്ത് നിന്ന് കാണാതായ അധ്യാപികയെ ഇറ്റാനഗറിൽ മരിച്ച നിലയിൽ കണ്ടെത്തി. മാര്ച്ച് 27 നാണ് ആര്യ എന്ന അദ്ധ്യാപികയെ തിരുവനന്തപുരത്ത് നിന്ന് കാണാതായത്. ഇപ്പോൾ ഇറ്റാനഗറിലെ ഒരു ഹോട്ടലിൽ നിന്ന് മലയാളികളായ ദമ്പതികളോടൊപ്പം മരിച്ച നിലയിൽ കണ്ടെത്തി. കോട്ടയം സ്വദേശികളായ ദമ്പതികളായ നവീന്റെയും ദേവിയുടെയും മൃതദേഹമാണ് കണ്ടെത്തിയത്.
സ്വകാര്യ സ്കൂളിൽ അധ്യാപികയായിരുന്നു ആര്യ. ആര്യയുടെ തിരോധാനവുമായി ബന്ധപ്പെട്ട് വട്ടിയൂർക്കാവ് പോലീസ് കേസ് രജിസ്റ്റർ ചെയ്തിരുന്നു. ആര്യയ്ക്കായുള്ള തിരച്ചിൽ തുടരുന്നതിനിടെയാണ് ആര്യ മരിച്ചതായി സ്ഥിതീകരിച്ചത്. മാർച്ച് 27 ന് ആര്യ ആരോടും പറയാതെ വീട് വിട്ട് പോകുകയായിരുന്നു. തുടർന്ന് ബന്ധുക്കൾ പല സ്ഥലങ്ങളിലും അന്വേഷിച്ചിരുന്നുവെങ്കിലും കണ്ടെത്താനായില്ല. തുടർന്നാണ് പോലീസിൽ പരാതി നൽകിയത്. ഇവരോടൊപ്പം ഉണ്ടായിരുന്ന ദേവിയും ആര്യയും ഒരേ സ്കൂളിലെ അധ്യാപികമാരാണ്.
വട്ടിയൂർക്കാവ് പോലീസ് നടത്തിയ അന്വേഷണത്തിലാണ് ആര്യയും ദേവിയും ഭർത്താവും ഗുവാഹത്തിയിലേക്ക് പോയതായി കണ്ടെത്തിയത്. നവീനും ദേവിയും വിനോദയാത്ര പോകുന്നുവെന്ന് പറഞ്ഞാണ് വീട്ടിൽ നിന്ന് പോയത്.
മൂന്ന് പേരുടെയും മരണത്തിൽ ദുരൂഹത തുടരുകയാണ്. മൂന്ന് പേരുടെയും ശരീരത്തിൽ വ്യത്യസ്തമായ മുറിവുകൾ ഉണ്ടായിരുന്നുവെന്നും രക്തം വാർന്നാണ് മൂന്ന് പേരും മരിച്ചതെന്നുമാണ് പുറത്തുവരുന്ന റിപ്പോർട്ട്.
