കോട്ടയം: ട്രെയിനിനുള്ളിൽ വെച്ച് യാത്രക്കാരനെ കടിച്ചത് പാമ്പ് തന്നെയെന്ന് സ്ഥിതീകരണം. ഗുരുവായൂർ-മധുര എക്സ്പ്രസിലാണ് സംഭവം നടന്നത്. മധുര സ്വദേശി കാർത്തി എന്ന യുവാവിനാണ് പാമ്പു കടിയേറ്റത്. നിലവിൽ യുവാവിന്റെ ആരോഗ്യനില തൃപ്തികരമെന്ന് ഡോക്ടർമാർ അറിയിച്ചു.
കോട്ടയം ഏറ്റുമാനൂരിൽ വച്ചാണ് മധുര സ്വദേശിയായ യുവാവിന് പാമ്പുകടിയേറ്റത്. യുവാവിനെ പരിശോധിച്ചതിൽ നിന്നാണ് കോട്ടയം മെഡിക്കൽ കോളേജിലെ ഡോക്ടർമാർ യുവാവിനെ കടിച്ചത് പാമ്പ് തന്നെയാണെന്ന് സ്ഥിരീകരിച്ചത്. എന്നാൽ ഏതു പാമ്പാണ് കടിച്ചത് എന്നതിനെപ്പറ്റി വ്യക്തതയില്ല. നിലവിൽ കോട്ടയം മെഡിക്കൽ കോളേജിൽ ചികിത്സയിലാണ് യുവാവ്.
എന്താണ് തന്നെ കടിച്ചതെന്ന് താൻ കണ്ടില്ലെന്നാണ് യുവാവ് പറയുന്നത്. എന്നാൽ അടുത്തുള്ള യാത്രക്കാരാണ് പാമ്പ് പോകുന്നത് കണ്ടുവെന്ന് യുവാവിനെ അറിയിച്ചത്. ഇന്ന് രാവിലെ 9:30 ഓടെയാണ് സംഭവം നടന്നത്.
