വയനാട്: ഇന്ന് മുതൽ മുത്തങ്ങ, തോൽപെട്ടി ഇക്കോ ടൂറിസം കേന്ദ്രങ്ങളിൽ വിനോദസഞ്ചാരികൾക്കു വിലക്ക്. ഏപ്രിൽ 15 വരെയാണ് നിരോധനം. പ്രിന്സിപ്പൽ ചീഫ് ഫോറസ്റ്റ് കൺസർവേറ്ററാണ് ഉത്തരവിട്ടത്.
വയനാടന് കാടുകളിലേക്ക് കർണാടക, തമിഴ്നാട് വനപ്രദേശങ്ങളിൽ നിന്നും വന്യജീവികൾ തീറ്റയും വെള്ളവും തേടി കൂട്ടത്തോടെ വരാന് തുടങ്ങിയ സാഹചര്യത്തിലാണിത്. കൂടാതെ വന്യജീവിസങ്കേതത്തിൽ വരൾച്ച രൂക്ഷമാണ്. ഈ സാഹചര്യത്തിൽ കാട്ടുതീ ഭീഷണിയും ഉണ്ട്.
ഈ സമയത്ത് ഇക്കോ ടൂറിസം കേന്ദ്രങ്ങളിലെ വിനോദസഞ്ചാരം വന്യജീവികളുടെ സ്വൈരവിഹാരത്തിനു തടസ്സം സൃഷ്ടിക്കും. അതുപോലെ വിനോദ സഞ്ചാരികളുടെ സുരക്ഷിതത്വത്തിനു ഭീഷണിയുണ്ടാകാനും സാധ്യതയുണ്ട്. ഇത് കണക്കിലെടുത്താണ് വിനോദസഞ്ചാരത്തിന് താൽക്കാലിക വിലക്ക് ഏർപ്പെടുത്തിയിരിക്കുന്നത്.
