തിരുവനന്തപുരം: കെ. സുധാകരനെതിരേ കേസെടുത്ത സംഭവത്തിൽ പ്രതികരണവുമായി കോൺഗ്രസ് നേതാവ് രമേശ് ചെന്നിത്തല. ഈ നടപടി തികച്ചും രാഷ്ട്രീയ പ്രേരിതമാണെന്നാണ് രമേശ് ചെന്നിത്തല ആരോപിക്കുന്നത്. പിണറായി വിജയൻ പ്രതിപക്ഷ നേതാക്കളെ ഓലപ്പാമ്പ് കാട്ടി ഭയപ്പെടുത്താൻ ശ്രമിക്കുകയാണെന്നും അഴിമതിയിൽ മുങ്ങി നിൽക്കുന്ന സംസ്ഥാന സർക്കാരിന് മുഖം രക്ഷിക്കാനുള്ള പൊറാട്ട് നാടകത്തിന്‍റെ ഭാഗമാണ് കെ. സുധാകരനെതിരായ നടപടിയെന്നും അദ്ദേഹം പറഞ്ഞു.
പ്രതിപക്ഷത്തിന്‍റെ വായടപ്പിക്കാൻ ഇതൊന്നും കൊണ്ടെന്നും കഴിയില്ലെന്നും സർക്കാരിനെതിരെ മിണ്ടിയാൽ കേസിൽ കുടുക്കുന്ന മോദിയുടെ ഫാസിസ്റ്റ് നയം തന്നെയാണ് പിണറായിയുടേതെന്നും ചെന്നിത്തല വ്യക്തമാക്കി. തുടർ ഭരണം ലഭിച്ചതിന്‍റെ അഹങ്കാരമാണ് സംസ്ഥാന സർക്കാരിന്, ഹുങ്കിനുള്ള മറുപടി ജനങ്ങൾ നൽകുന്ന കാലം വിദൂരമല്ലെന്നും ചെന്നിത്തല കൂട്ടിച്ചേർത്തു.
