കഴക്കൂട്ടം : പിക്കപ്പ് വാനും ബൈക്കും കൂട്ടിയിടിച്ച് അപകടം. അപകടത്തിൽ ഒരാൾ മരിച്ചു. ബാലരാമപുരം സ്വദേശി സൂര്യ ആണ് മരിച്ചത്. കൂടെയുണ്ടായിരുന്ന ആൾക്ക് ഗുരുതര പരിക്കേറ്റു. ഒരാളുടെ പരിക്ക് ഗുരുതരമാണ്. മലപ്പുറം സ്വദേശിയായ അൻസാറിനെ ഗുരുതര പരിക്കുകളോടെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
വ്യാഴാഴ്ച വൈകിട്ട് 4 മണിയോടെയാണ് സംഭവം നടന്നത്. കഴക്കൂട്ടം ശ്രീകാര്യം റോഡിൽ അമ്പലത്തിൻ കരയിലായിരുന്നു അപകടം. കഴക്കൂട്ടം ഭാഗത്ത് നിന്നും കാര്യവട്ടം ഭാഗത്തേക്ക് വരുകയായിരുന്ന പിക്കപ്പ് വാൻ എതിർ ദിശയിലേക്ക് പോകുവാൻ തിരിയുന്നതിനിടെ അമിത വേഗതയിൽ വന്ന ബൈക്ക് പിക്കപ്പിന്റെ ഒരു വശത്ത് ഇടിച്ചു കയറുകയാരുന്നു.
ഗുരുതരമായി പരിക്കേറ്റിട്ടും അര മണിക്കൂറോളം അപകടത്തിൽപ്പെട്ടവർ റോഡ് വശത്ത് കിടക്കുകയായിരുന്നുവെന്നും ആരോപണമുണ്ട്.തുടർന്ന് പോലീസ് എത്തിയാണ് ഇവരെ മെഡിക്കൽ കോളേജ് ആശുപത്രിയിലേക്ക് മാറ്റിയത്.
കഴക്കൂട്ടം അൽസാജ് ആഡിറ്റോറിയത്തിൽ വിവാഹ ചടങ്ങിന് കാറ്ററിങ് ജോലിക്ക് വന്നവരാണ് അപകടത്തിൽപ്പെട്ടത്. ഇവിടെയുണ്ടായിരുന്ന മറ്റൊരാളിന്റെ ബൈക്ക് എടുത്ത് പോകുന്നതിനിടെയായിരുന്നു അപകടം.കഴക്കൂട്ടം പോലീസ് കേസെടുത്തു. പിക്കപ്പ് വാനിനെയും ഡ്രൈവറെയും പോലീസ് കസ്റ്റഡിയിൽ എടുത്തു.
