മലപ്പുറം: യുവതിയെ ഭർതൃഗൃഹത്തിൽ തൂങ്ങിമരിച്ച നിലയിൽ കണ്ടെത്തി. മലപ്പുറം മഞ്ചേരി പന്തല്ലൂരിലാണ് സംഭവം നടന്നത്. സംഭവത്തിൽ ഭർതൃപിതാവിനെ അറസ്റ്റ് ചെയ്തു. മലപ്പുറം മഞ്ചേരി പന്തല്ലൂരിലാണ് സംഭവം നടന്നത്. നാല് കുട്ടികളുടെ മാതാവായ മഞ്ചേരി വെള്ളില സ്വദേശിനി തഹ്ദിലയെയാണ് തൂങ്ങിമരിച്ച നിലയിൽ കണ്ടെത്തിയത്.
വ്യാഴാഴ്ച്ച രാത്രി 9 മണിയോടെയാണ് തഹ്‌ദിലയെ ഭർത്താവ് നിസാറിന്റെ പന്തല്ലൂരിലെ വീട്ടിൽ തൂങ്ങിമരിച്ച നിലയിൽ കണ്ടെത്തിയത്. കേസുമായി ബന്ധപ്പെട്ട് ഭർതൃപിതാവ് പന്തല്ലൂർ കിഴക്കുപറമ്പ് സ്വദേശി അബൂബക്കറാണ് അറസ്റ്റിലായത്. ആത്മഹത്യ പ്രേരണ കുറ്റം ചുമത്തിയാണ് അറസ്റ്റ്. അബൂബക്കർ യുവതിയെ ഉപദ്രവിച്ചിരുന്നുവെന്നാണ് ബന്ധുക്കളുടെ ആരോപണം.
തഹ്ദില ആത്മഹത്യ ചെയ്തതായി ശ്രദ്ധയിൽ പെട്ട ഭർത്താവിന്‍റെ വീട്ടുകാർ തഹ്ദിലയുടെ കുടുംബത്തെ വിളിച്ച് വിവരം അറിയിക്കുകയായിരുന്നു. ഉടൻ ആശുപത്രിയിൽ എത്തിക്കാൻ ആവശ്യപ്പെട്ടെങ്കിലും അതിന് അവർ തയാറായില്ലെന്ന് തഹ്ദിലയുടെ ബന്ധുക്കൾ ആരോപിക്കുന്നു.
