കഴക്കൂട്ടം: തിരുവനന്തപുരം വെട്ടുകാട് ഓട്ടോയും ജീപ്പും കൂട്ടിയിടിച്ച് അപകടം. അപകടത്തിൽ ഓട്ടോ ഡ്രൈവർ മരിച്ചു. ഫിഷറീസ് വകുപ്പിൻ്റെ ജീപ്പാണ് ഓട്ടോയുമായി കൂട്ടിയിടിച്ചത്.
തൃശൂർ ചാലക്കുടി സ്വദേശിയും കൊച്ചു വേളിയിൽ വാടകയ്ക്ക് താമസിക്കുന്ന ബേബി (58) ആണ് മരിച്ചത്. ഇന്ന് വൈകുന്നേരം മൂന്ന് മണിയോടെയാണ് അപകടം സംഭവിച്ചത്. തിരുവനന്തപുരം വെട്ടുകാട് പള്ളിക്കു സമീപത്തുവച്ച് ഓട്ടോയും ജീപ്പും നേർക്കുനേർ കൂട്ടിയിടിക്കുകയായിരുന്നു.
ജീപ്പ് അമിത വേഗതയിൽ ആയിരുന്നുവെന്നാണ് ദൃക്സാക്ഷികൾ പറയുന്നത്. ജീപ്പ് ഓട്ടോയുമായി ഇടിച്ച് ഓട്ടോറിക്ഷ തലകീഴായി മറിഞ്ഞ് പൂർണ്ണമായും തകരുകയായിരുന്നു. അപകടത്തിൽ ഗുരുതരമായി പരിക്കേറ്റ ബേബിയെ മെഡിക്കൽ കോളേജ് ആശുപത്രിയിൽ ഉടൻ എത്തിച്ചു. എന്നാൽ ജീവൻ രക്ഷിക്കാനായില്ല. ഭാര്യ: മഞ്ചു, മകൾ: അയറിൽ കെ ബേബി,ആൻലിൻ കെ ബേബി
