കുളത്തൂർ: കഴക്കൂട്ടത്ത് എം.ഡി.എം.എയുമായി യുവാവ് പിടിയിൽ. എം.ഡി.എം.എ.വിൽക്കാൻ ശ്രമിക്കുന്നതിനിടയിലാണ് ഇയാളെ തുമ്പ പൊലീസ് പിടികൂടിയത്. തിരുവനന്തപുരം പ്രാവച്ചമ്പലം സ്വദേശി വിഷ്ണുവിനെയാണ് (29) പൊലീസ് അറസ്റ്റ് ചെയ്തത്. ട്രെയിനിലാണ് ഇയാൾ എം ഡി എം എ കടത്തികൊണ്ട് വന്നത്.
ഇയാളിൽ നിന്ന് 150 ഗ്രാം എം.ഡി.എം.എ. കണ്ടെടുത്തു. വിപണിയിൽ നാലര ലക്ഷം രൂപ വരുന്ന എം ഡി എം എയാണ് വിഷ്ണുവിന്റെ പക്കൽ നിന്ന് പിടികൂടിയത്. പോലീസിന് ലഭിച്ച രഹസ്യ വിവരത്തെത്തുടർന്ന് സിറ്റി ഡാൻസാഫ് ടീമും തുമ്പ പൊലീസും സംയുക്തമായി നടത്തിയ പരിശോധനയിലാണ് വിഷ്ണു കുടുങ്ങിയത്. ട്രെയിനിൽ എത്തിയ ഇയാൾ കഴക്കൂട്ടം റെയിൽവെ സ്റ്റേഷനിൽ ഇറങ്ങി സമീപത്തെ ഇടവഴിയിൽ എം.ഡി.എം.എ. കൈമാറാൻ കാത്തു നിൽക്കുമ്പോഴാണ് പൊലിസിൻ്റെ പിടിയിലായത്.
നേരെത്തയും സമാന കേസിൽ ഇയാൾ ജയിൽ ശിക്ഷ അനുഭവിച്ചിരുന്നു. അഞ്ചു മാസത്തെ ജയിൽ ശിക്ഷ കഴിഞ്ഞ് ഒരു മാസം മുൻപാണ് ജാമ്യത്തിൽ ഇറങ്ങിയത്. ഇതിനു പിന്നാലെയാണ് വീണ്ടും എം ഡി എം എയുമായി ഇയാൾ പോലീസ് പിടിയിലാക്കുന്നത്. നേമം സ്വദേശിക്ക് വേണ്ടിയാണ് എം.ഡി.എം.എ. വാങ്ങിയതെന്ന് ഇയാൾ പൊലീസിനോട് പറഞ്ഞു.
