തിരുവനന്തപുരം: അപകടത്തിൽപ്പെട്ട് അര മണിക്കൂറോളം റോഡിൽ കിടന്ന തിരുവനന്തപുരം സ്വദേശിക്ക് ദാരുണാന്ത്യം. തിരുവനന്തപുരം മാറനല്ലൂർ സ്വദേശി വിവേക് (23) ആണ് മരിച്ചത്. ഇക്കഴിഞ്ഞ മൂന്നാം തീയതിയാണ് സംഭവം നടന്നത്.
മാറനല്ലൂർ മലവിള പാലത്തിന് സമീപം പുലർച്ചെ ഒരു മണിയോടെയാണ് അപകടം ഉണ്ടായത്. വാഹനത്തിന്റെ നിയന്ത്രണം നഷ്ടപ്പെട്ട് ബൈക്ക് പോസ്റ്റിലിടിച്ച് യുവാവ് റോഡിലേക്ക് തെറിച്ച് വീഴുകയായിരുന്നു. ഈ സമയം ശക്തമായ മഴയും ഉണ്ടായിരുന്നു.
സംഭവം നടന്ന സമയം യാത്രക്കാർ സ്ഥലത്ത് ഉണ്ടായിരുന്നു. എന്നാൽ ആരും സഹായിക്കാൻ തയ്യാറായില്ലെന്നും ആക്ഷേപം ഉണ്ട്. അരമണിക്കൂറിൽ അധികമാണ് യുവാവ് റോഡിൽ രക്തം വാർന്ന് കിടന്നത്. തലയ്ക്ക് ഗുരുതരമായി പരിക്കേറ്റതാണ് മരണ കാരണം. വിവരം അറിഞ്ഞ് മാറനല്ലൂർ പൊലീസ് സംഭവസ്ഥലത്തെത്തി 15 മിനിറ്റ് കഴിഞ്ഞാണ് ആംബുലൻസിൽ യുവാവിനെ ആശുപത്രിയിൽ പ്രവേശിപ്പിച്ചത്.
