കഴക്കൂട്ടം: കുടിവെള്ള വിതരണവുമായി ബന്ധപ്പെട്ട തർക്കം അണ്ടൂർക്കോണം പഞ്ചായത്ത് ഓഫീസിനുള്ളിൽ സംഘർഷത്തിൽ കലാശിച്ചു. സംഭവത്തിൽ പഞ്ചായത്ത് പ്രസിഡന്റ് ആർ. അർച്ചനയ്ക്കും ശ്രീപാദം വാർഡ് മെമ്പർ ലക്ഷ്മിക്കും പരിക്കേറ്റു. ഇരുവരും ആശുപത്രിയിൽ ചികിത്സ തേടി. ഇന്ന് രാവിലെ 11.30-ഓടെയായിരുന്നു നാടകീയമായ സംഭവങ്ങൾ അരങ്ങേറിയത്. ശ്രീപാദം വാർഡിലെ കുടിവെള്ള വിതരണവുമായി ബന്ധപ്പെട്ട തർക്കമാണ് സംഘർഷത്തിന്റെ ആധാരം.
വാർഡ് മെമ്പറെ അറിയിക്കാതെ പ്രസിഡന്റും വൈസ് പ്രസിഡന്റും ചേർന്ന് വാർഡിൽ നേരിട്ട് കുടിവെള്ളം വിതരണം ചെയ്തതാണ് പ്രശ്നങ്ങൾക്ക് തുടക്കമിട്ടത്. ഇതിന്റെ ദൃശ്യങ്ങൾ പ്രസിഡന്റ് സോഷ്യൽ മീഡിയയിൽ പങ്കുവെച്ചതോടെ, തന്നെ അവഗണിച്ചുവെന്നാരോപിച്ച് മെമ്പർ ലക്ഷ്മിയും മക്കളും പഞ്ചായത്ത് ഓഫീസിലെത്തി പ്രസിഡന്റിനെ ചോദ്യം ചെയ്യുകയായിരുന്നു. ഇത് പിന്നീട് രൂക്ഷമായ വാക്കുതർക്കത്തിലേക്കും പരസ്യമായ കൈയാങ്കളിയിലേക്കും നീങ്ങി.
തന്നെ മെമ്പറുടെ മക്കൾ മർദിച്ചതായി പ്രസിഡന്റ് ആരോപിക്കുമ്പോൾ, പ്രസിഡന്റിന്റെ മകൻ തങ്ങളെ മർദിച്ചതായി മെമ്പറും പരാതിപ്പെടുന്നു. ഏതാനും ദിവസങ്ങൾക്ക് മുമ്പ് പഞ്ചായത്ത് വൈസ് പ്രസിഡന്റ് ഡ്രൈവറെ മർദിച്ചതുമായി ബന്ധപ്പെട്ട വിവാദങ്ങൾ നിലനിൽക്കെയാണ് പുതിയ സംഭവം. കുടിവെള്ള ക്ഷാമത്തിന് പരിഹാരം കാണേണ്ട ജനപ്രതിനിധികൾ തമ്മിലടിക്കുന്നത് നാട്ടുകാർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. വരും ദിവസങ്ങളിൽ വിഷയത്തിൽ രാഷ്ട്രീയ പ്രതിഷേധങ്ങൾ ശക്തമാകാനാണ് സാധ്യത.
