വാഷിങ്ടണ്: വൈറ്റ്ഹൗസ് മാധ്യമ പ്രവര്ത്തകരുടെ അത്താഴവിരുന്നിനിടെ വാഷിങ്ടണ് ഹില്ട്ടണ് ഹോട്ടലില് വെടിവെപ്പ്. വെടിവെപ്പ് നടന്നതിന് പിന്നാലെ ആദ്യ പ്രതികരണവുമായി യുഎസ് പ്രസിഡന്റ് ഡോണൾഡ് ട്രംപ്. കാലിഫോര്ണിയയില് നിന്നുള്ള 31-കാരനായ കോള് ടോമസ് അലന് ആണ് അക്രമിയെന്ന് ട്രംപ് സ്ഥിരീകരിച്ചു.
സംഭവത്തിൽ ആർക്കും പരിക്കേറ്റിട്ടില്ലെന്നും അക്രമി പിടിയിലായെന്നും ട്രംപ് സ്ഥിരീകരിച്ചു. അക്രമി 45 മീറ്റര് അകലെയാണ് വെടിയുതിര്ത്തതെന്നും അത്താഴ വിരുന്ന് നടന്ന ഹാളില് നിന്നും ഏറെ അകലെയായിരുന്നുവെന്നും ട്രംപ് പറഞ്ഞു.താനും പ്രഥമ വനിതയും ക്യാബിനറ്റ് അംഗങ്ങളും സുരക്ഷിതരാണെന്നും ഡോണള്ഡ് ട്രംപ് പറഞ്ഞു.
സുരക്ഷാ ഉദ്യോഗസ്ഥരുടെ സമയോചിതമായ ഇടപെടലിനെ അദ്ദേഹം അഭിനന്ദിച്ചു. ‘ഷോ തുടരട്ടെ’ എന്ന് താൻ നിർദ്ദേശിച്ചെങ്കിലും, അന്തിമ തീരുമാനം നിയമപാലകർക്ക് വിട്ടുകൊടുക്കുകയാണെന്നും ട്രംപ് വ്യക്തമാക്കി.വിരുന്നു നടന്ന സ്ഥലത്തേക്ക് ആയുധവുമായി അക്രമിയെത്തിയത് എങ്ങനെയെന്ന് വ്യക്തമല്ലെന്നാണ് ട്രംപ് പറയുന്നത്.
വലിയ കാര്യങ്ങള് ചെയ്യുന്നവര്ക്കെതിരെയാണ് വധശ്രമം ഉണ്ടാകാറുള്ളതെന്നും ട്രംപ് പറഞ്ഞു. മാത്രമല്ല ആരെയും നിയമം കൈയിലെടുക്കാന് അനുവദിക്കില്ലെന്നും ട്രംപ് പറഞ്ഞു. ഇത് ആദ്യത്തെ സംഭവമല്ലെന്നും വധശ്രമം മുമ്പും ഉണ്ടായിട്ടുണ്ടെന്നും ഇത്തരം സംഭവങ്ങള് ആവര്ത്തിക്കരുതെന്നും അദ്ദേഹം വ്യക്തമാക്കി.
വെടിയുതിർത്ത പ്രതിയെ പൊലീസ് അറസ്റ്റ് ചെയ്തു. തോക്കുകളും കത്തികളുമായി എത്തിയ ആളുടെ ചിത്രം പുറത്തുവിട്ടു. ഇയാളെ യുഎസ് സീക്രട്ട് സർവീസ് കീഴടക്കുന്നതിന്റെ ദൃശ്യങ്ങളും പുറത്തു വിട്ടു. കാലിഫോർണിയയിൽ നിന്നുള്ള 31 വയസ്സുള്ള കോൾ തോമസ് അലൻ ആണ് അക്രമിയെന്ന് യുഎസ് അധികൃതർ സ്ഥിരീകരിച്ചു.
