തിരുവനന്തപുരം: തിരുവനന്തപുരം മെഡിക്കൽ കോളേജിൽ വീണ്ടും ലിഫ്റ്റ് പണിമുടക്കി. ഡോക്ടറും രോഗിയുമാണ് ഇന്ന് ലിഫ്റ്റിൽ കുടുങ്ങിയത്. കഴിഞ്ഞ ദിവസം ഒരു രോഗി ഇവിടെ ഒന്നര ദിവസം ലിഫ്റ്റിൽ കുടുങ്ങിയിരുന്നു. ഇതിനു പിന്നാലെയാണ് വീണ്ടും ലിഫ്റ്റ് പണിമുടക്കിയിരിക്കുന്നത്.
അത്യാഹിത വിഭാഗത്തിൽ നിന്നും സിടി സ്കാനിലേക്ക് പോകുന്ന ലിഫ്റ്റാണ് തകരാറിലായത്. ലിഫ്റ്റ് ഉളളിൽ നിന്നും തുറക്കാൻ കഴിയാതാകുകയായിരുന്നു. ലിഫ്റ്റിൽ കുടുങ്ങിയ ഉടൻ തന്നെ ഡോക്ടര്‍ ലിഫ്റ്റിലെ അലാറം മുഴക്കുകയും ഫോണില്‍ വിളിക്കുകയും ചെയ്തു. ലിഫ്റ്റ് തകരാറിലായത് അറിഞ്ഞ ഉടൻ തന്നെ ബന്ധപ്പെട്ട ജീവനക്കാരെത്തി ലിഫ്റ്റില്‍ കുടുങ്ങിയവരെ പുറത്തെത്തിച്ചു.
ഏകദേശം അര മണിക്കൂറോളമാണ് ഇരുവരും ലിഫ്റ്റിൽ കുടുങ്ങിയത്. ഇന്ന് ഉച്ചയ്ക്കാണ് സംഭവം നടന്നത്. ഡോക്ടർക്ക് ഒപ്പമുണ്ടായിരുന്ന രോഗി സ്ട്രക്ച്ചറിലായിരുന്നു.
