തിരുവനന്തപുരം: ഇനി തിരുവനന്തപുരം നഗരത്തെ നയിക്കുക വി വി രാജേഷ്. സംസ്ഥാനത്തെ ആറ് കോര്പ്പറേഷന് ഉള്പ്പെടെയുള്ള തദ്ദേശ സ്ഥാപനങ്ങളിലെ മേയര്മാരെയും ഡെപ്യൂട്ടി മേയര്മാരെയും തെരഞ്ഞെടുത്തു.
തിരുവനന്തപുരം കോര്പറേഷന് മേയറായി വിവി രാജേഷിനെ തെരഞ്ഞെടുത്തു. സ്വതന്ത്രനായി ജയിച്ച പാറ്റൂര് രാധാകൃഷ്ണന് ബിജെപിക്ക് വോട്ട് ചെയ്തു. സാധുവായ 97 വോട്ടുകളിൽ വി വി രാജേഷിന് 51 പേരുടെ പിന്തുണ ലഭിച്ചു. 50 ബിജെപി അംഗങ്ങളുടെയും ഒരു സ്വതന്ത്രന്റെയും വോട്ടുകളാണ് ലഭിച്ചത്.
കോണ്ഗ്രസിന്റെ രണ്ട് വോട്ടുകള് അസാധുവായി. യുഡിഎഫിന്റെ കെ എസ് ശബരീനാഥന് 17 വോട്ടുകളാണ് ലഭിച്ചത്. എൽഡിഎഫിന്റെ മേയർ സ്ഥാനാർത്ഥി ആർ പി ശിവജിക്ക് 29 വോട്ടുകളാണ് ലഭിച്ചത്.
തിരുവനന്തപുരം മേയർ സ്ഥാനം ഏറ്റെടുത്തതിനു പിന്നാലെ വി വി രാജേഷിനു ആദ്യ പരാതി ലഭിച്ചു. ആര്യ രാജേന്ദ്രൻ മേയറായി പ്രവർത്തിച്ചിരുന്ന കാലത്തെ അഴിമതികളെ കുറിച്ച് സമഗ്ര അന്വേഷണം ആവശ്യപ്പെട്ട് പരാതി. മുൻ കോൺഗ്രസ് കൗൺസിലർ ശ്രീകുമാറാണ് പരാതി നൽകിയത്.
