കൊച്ചി: മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി പ്രതിപക്ഷ നേതാവ് വി ഡി സതീശൻ. കേരളത്തില് വിലക്കയറ്റമുണ്ടെന്ന് അറിയാത്ത ഒരേയൊരാള് മുഖ്യമന്ത്രിയാണെന്ന് വി ഡി സതീശന്. ഇപ്പോൾ കേരളത്തിൽ കാണം വിറ്റാലും ഓണം ഉണ്ണാനാകാത്ത അവസ്ഥയാണ്. നേരത്തെ 7 ലക്ഷം പേര്ക്ക് ഓണക്കിറ്റ് കൊടുക്കുമെന്നാണ് പറഞ്ഞത്. അത് ഇപ്പോൾ ചുരുക്കി ആറ് ലക്ഷമാക്കി.
അതില് തന്നെ പത്ത് ശതമാനം പോലും വിതരണം ചെയ്യാനായിട്ടില്ല. കെ.എസ്.ആര്.ടി.സിയെ പോലെ സിവില് സപ്ലൈസ് കോര്പറേഷനെ സര്ക്കാര് ദയാവദത്തിന് വിട്ടുനല്കിയിരിക്കുകയാണെന്നും കരാറുകാര്ക്ക് 700 കോടിയോളം രൂപയാണ് കൊടുക്കാനുള്ളതെന്നും വി ഡി സതീശൻ കുറ്റപ്പെടുത്തി.
സപ്ലൈകോ 750 കോടി ചോദിച്ചപ്പോള് 70 കോടി മാത്രമാണ് നല്കിയത്. എന്നിട്ടും ഒരു നാണവുമില്ലാതെയാണ് കേരളത്തില് വിലക്കയറ്റമില്ലെന്ന് മുഖ്യമന്ത്രി പ്രസംഗിച്ചത്. വിലക്കയറ്റമുണ്ടെന്ന് അറിയാത്ത ഏകയാള് മുഖ്യമന്ത്രിയായിരിക്കും. ദന്തഗോപുരത്തില് നിന്നും മുഖ്യമന്ത്രി താഴെയിറങ്ങി വന്നാല് മാത്രമെ സാധാരണക്കാരുടെ പ്രശ്നങ്ങള് മനസിലാക്കാന് സാധിക്കൂവെന്നും പ്രതിപക്ഷ നേതാവ് പറഞ്ഞു.
