തിരുവനന്തപുരം: തലസ്ഥാന നഗരിയെ ഞെട്ടിച്ച കരമന അഖിൽ കൊലപാതക കേസിൽ മുഖ്യപ്രതികളെല്ലാം പിടിയിലായതായി പോലീസ്. ഇതോടെ ഏഴ് പേരെയാണ് സംഭവം നടന്ന് രണ്ട് ദിവസത്തിനുള്ളിൽ പോലീസ് പിടിയിലായത്.
കുറ്റകൃത്യത്തിൽ നേരിട്ട് പങ്കെടുത്ത സുമേഷ്, വിനീത്, അപ്പു എന്ന അഖിൽ, ഡ്രൈവർ അനീഷ്, ഹരിലാൽ, കിരൺ കൃഷ്ണ, കിരൺ എന്നിവരെയാണ് പോലീസ് പിടികൂടിയത്. മുഖ്യപ്രതികളായ സുമേഷിനെയും വിനീതിനെയും അഖിലിനെയും പോലീസ് ഇന്നാണ് പിടികൂടിയത്. വിനീതിനെ തമ്പാനൂർ ചെങ്കൽച്ചൂളയിൽ നിന്നാണ് പിടികൂടിയത്. തമിഴ്നാട്ടിൽ നിന്നാണ് അഖിലിനെ പിടികൂടിയത്.
അനീഷ്, ഹരിലാൽ, കിരൺ കൃഷ്ണ, കിരൺ എന്നിവരാണ് നേരത്തെ പിടിയിലായത്. ഇതിൽ കൊലപാതക സമയത്ത് ഇന്നോവ വാഹനം ഓടിച്ചിരുന്ന അനീഷിനെ പിടികൂടിയപ്പോഴാണ് മറ്റു പ്രതികളിലേക്ക് എത്താൻ പോലീസിനു സഹായകമായത്. പ്രതികളെ എല്ലാം റിമാൻഡ് ചെയ്തു. നാളെ കോടതിയിൽ ഹാജരാക്കിയ ശേഷം പ്രതികളെ കസ്റ്റഡിയിൽ വാങ്ങി തെളിവെടുപ്പ് നടത്തുമെന്ന് പോലീസ് അറിയിച്ചു.
